напис (м.)
Кришум на грб ќе му закачеа парче книга со некаков напис и ќе се смееја по него.
„Улица“
од Славко Јаневски
(1951)
Се прибираше, раскажуваше како да чита туѓ напис. Војна. Април. Планина... ...
„Две Марии“
од Славко Јаневски
(1956)
Низ разретчените бранови на нејзината коса тој го читаше написот врз темното тело на бродот Викторија.
„Пустина“
од Ѓорѓи Абаџиев
(1961)
Се насмеав на написот, иако, всушност веста беше тажна.
„Младиот мајстор на играта“
од Александар Прокопиев
(1983)
Не сум дојден овде да купам галерија на души за помал или поголем напис.
„Забранета одаја“
од Славко Јаневски
(1988)
Уште пред да може да им се најде некакво поголемо значење на нејзините врели и недоречени написи (секако под псевдоним) во весниците Дрошак и Про Армениа, некако во времето ерменско- македонскиот митинг во Париз, во 1904, или порано, Рубина Фаин сѐ почесто сонува црвени пожари и виорења на пламени знамиња над кои, сличен на легендарниот громовник стои таткото на ерменското револуционерно движење, Кристапор Микелјан, жолт, расторбешен, куц и брадест, сличен и на праматар и на изгладнет филозоф, човек во чии очи можела да се прочита болката на сите испозаклани Ерменци од преострите сабји благословени од самиот султан, од неговите суви усни без насмевка и затворени во венец на побелена брада, света и злокобна како за него.
„Забранета одаја“
од Славко Јаневски
(1988)
Ги читаше нестрпливо насловите на написите на западните високотиражни весници и ги бележеше нивните содржини.
„Времето на козите“
од Луан Старова
(1993)
Аргументите на овој напис одат до таму што говорат дека инфекцијата со ХИВ не мора да заврши со СИДА, но стилот на живеење кој во себе ја вклучува употребата на вакви дроги и поминување на цели викенди во играње го слабее имунолошкиот систем.
„МАРГИНА бр. 8-9“
(1994)
Поголемиот дел од преостанатите години на својот живот таа ќе го мине пишувајќи написи и книги за своите патувања низ светот.
„МАРГИНА бр. 4-5“
(1994)
Околу еден месец откако ја завршив книгата, излезе еден напис во Esquire.
„МАРГИНА бр. 32-33“
(1996)
Најкорисните написи за читателите заинтересирани за современата уметност се написите за деструктивната реторика на авангардата.
„МАРГИНА бр. 37“
(1997)
Албанскиот полиграф ќе соработува во книжевното списание на Аполинер „Гозбата на Езоп” под псевдоним и на француски јазик, во духот и стилот на тогашните европски авангардни автори, вложувајќи го другиот дел на својата личност во написи под вистинското име во прилог на албанската преродба.
„Атеистички музеј“
од Луан Старова
(1997)
Винстон, покрај редовната работа, секојдневно минуваше долги часови над комплетите на „ Тајмс“, менувајќи ги и разубавувајќи ги написите што требаше да бидат цитирани во говорите.
„1984“
од Џорџ Орвел
(1998)
Пораките што ги беше добил се однесуваа на написи или на вести кои, од една или друга причина, се сметаше за потребно да бидат изменети или, како што гласеше официјалниот израз, да бидат исправени.
„1984“
од Џорџ Орвел
(1998)
„Пред некој ден прочитав еден од вашите написи во „Тајмс“.
„1984“
од Џорџ Орвел
(1998)
Ми стана мило што наидов на овој напис. Не ми зборуваше за ништо посебно, иницијалите не можев да ги поврзам со некоја личност, но ме возбудуваше дека зад Маказар стои едно изминато време, некој слој кој скржаво ми се открива.
„Бунар“
од Димитар Башевски
(2001)
Сега работите ми станаа појасни. Мојот предок оставил траги што не се завеваат (еве добив и потврда за бунарот во кој лежело она парче железо со написот „Поцо“) а и физички е опишан: строен маж, секогаш убаво облечен.
„Бунар“
од Димитар Башевски
(2001)
Исто така во написот се осврнува и на однесувањето на македонскиот народ во борбата против окупаторот и неговиот однос кон борците на бригадата.
„Британските воени мисии во Македонија (1942-1945)“
од Тодор Чепреганов
(2001)
Освен раскажувањата, макар и многу површни и колебливи, во моето семејство од колено на колено, за мојот предок, а исто така и меѓу жителите на селото, во овој случај имаше барем две совпаѓања: прво, човекот што го споменуваше Јохан Барт под името „Поцо“ беше од Маказар, од каде што потекнував и јас, а и парчето метал со написот „Поцо“ се најде во Маказар и второ, се потсетив и на тоа дека мајката на Надежда, старата, во една прилика пред да почнеме со копањето на бунарот, ми рече дека, според нејзиното сеќавање на раскажувањата на луѓе, на тоа место некогаш веќе постоел бунар.
„Бунар“
од Димитар Башевски
(2001)
„Кога ќе дојдам кај тебе, да ги побарам написите за аерозагаденоста во Скопје?“
„Тополите на крајот од дедовата ливада“
од Бистрица Миркуловска
(2001)
