простор
мн. простори
Вид збор: Именка, машки род
Ранг: 293
1.
Празнина во која ги забележуваме сите предмети што нè опкружуваат чии својства се висина, должина и ширина; неограничено простирање во сите правци.
Примери:
Пред нив се простираше бескраен простор покриен со ниска трева.
Просторот од небото до планинските врвови беше исполнет со една прекрасна синевина.
Слично со:
околина (ж.)
2.
Заедно со времето, еден од општите, основни облици или рамки на постоење на материјалниот свет, во кој секое нешто има свое определено место.
3.
Дел, парче од Земјината површина со различна големина.
Примери:
Просторот околу градот беше исполнет со шуми.
Војската секојдневно освојува нови простори.
4.
Ограничено место во кое може да се смести нешто.
Примери:
Магацински простор.
Во багажниот простор на авионот била поставена бомбата.
Изложбен простор.
5.
Растојание, оддалеченост меѓу две или повеќе работи, лица, предмети и сл.
Примери:
Просторот меѓу буквите (зборовите) треба да се намали.
меѓуклеточен простор
6.
Празнина, со ништо исполнета шуплина, место.
Примери:
Во плакарот нема повеќе простор за нови работи.
Во картотеката нема простор за нов материјал.
Слично со:
шуплина (ж.)
7.
Физички универзум надвор од атмосферата на Земјата.
Примери:
Леталото се најде во безвоздушен простор.
Слично со:
вселена (ж.)
8.
Просторија или место за определена намена.
Примери:
Работен простор.
Деловен простор.
Рекреативен простор.
9.
Подрачје, област на некакво дејствување.
Примери:
Нов медицински простор.
Слично со:
подрачје (ср.)
Изрази
(војн.) Бришан простор - простор каде што нема заштита од оружјето на непријателот.
Воздушен простор - простор над територијата на една држава каде што, без дозвола не смеат да летаат туѓи авиони.
(спорт.) Казнен простор - дел од игралиштето пред голот каде што секој прекршок повлекува најстрога казна.
Станбен простор - големина на еден стан изразена во број на простории или во кубни метри.
(спорт.) Стартен простор - место каде што почнува некој натпревар.
